ووٹ ایک امانت ہے

 سنتے آئے ہیں کہ ووٹ ایک امانت ہے اس کا صحیح استعمال کریں ،استعمال کرنے کا موقع تو بچاری قوم کو 65سالوں میں ملا ہی صرف پانچ چھ بار ہے،اب پھر انتخابات آرہے ہیں اور اسی بات کا شور غوغا ہے،ایک چینل سے تعلیم کو ووٹ دو،پاکستان کو ووٹ دو کے اشتہار چلائے جارہے ہیں ۔سروے اور پچھلے ڈیٹا یہ بتاتے ہیں پڑھے لکھے افراد کی اکثریت ووٹ دینے سے کتراتی ہے اور امانت میں خیانت کی مرتکب ہوتی ہے ،کچھ لوگوں کی یہ سوچ ہے کہ پڑھ لکھ کر آدمی بزدل ہو جاتا ہے مگر میرا یہ خیال ہے کہ پڑھ لکھ کر وہ تجزیہ کرنے،سمجھنے اور سوچنے کے قابل ہو جاتا ہے ۔وہ ووٹ کے استعمال سے پہلے تمام سیاسی جماعتوں کے منشور اور اس کے امیدواروں کا تجزیہ کرتا ہے اور پھر یہ سمجھتا ہے کہ انھیں ووٹ دے کر تو امانت میں خیانت کرنا ہے۔

جب وہ  تجزیہ کرتا ہے تو سیاسی جماعتوں کا منشور صرف نعرے بازی کے لئے اور امیدوار پچھلے انتخابات میں جسے گالیاں دیتا تھا اب انہی کا امیدوار بناہوا نظر آتا ہے اور امیدواروں کے معیار کا اندازاہ تو ہمیں آجکل اچھی طرح ہوہی گیا ہے۔چونکہ علم اسے مزہبی تنگ نظری،برادی،رشتہ داری،لسانیت اور تنگ نظر قوم پرستی سے آزاد کردیتا ہے تو کوئی امیدوار اسکے زاویے میں نہی بیٹھتا اور وہ ووٹ کو امانت سمجھتے ہوئے اس کو حفاظت سے اگلے انتخابات تک محفوظ کر دیتا ہے۔

ہنا می

جاپانی قوم کا یہ امتزاج ہے کہ وہ قدرت کی طرف سے عطا کردہ نعمتوں سے بھر پور پیار کرتیں ہیں۔قدرت نے جہاں ان کو اور نعمتوں سے نوازا ہے وہیں چاروں موسم بھی واضح طور پر عطا کئے ہیں،جاپانیوں کا پھولوں سے پیار اور ان کو سجانے کا فن جسے ایکے بانا کہا جاتا یے اب ساری دنیا میں عام ہوتا جاریا یے۔اسی طرح موسموں کے اعتبار سے اسے تہوار کے طور پر منانے کی روایات بھی کئی صدیوں پر محیط ہے، سردیوں کے خاتمے اور بہار کے آغاز میں جگہ جگہ ساکورا یعنی چیری کے پھول درختوں پر کھل اٹھتے ہیں اور ان درختوں کے نیچے بیٹھ کر جاپانی قوم کھانا پینا ،اورناچتے گاتےہوئے لطف اندوز ہوتی ہے جسے ہنامی کہا جاتا یے۔

روایت کے مطابق یہ تہوار کوئی آٹھویں صدی سے منایا جاتا ہے پچھلے زمانے میں صرف اشرافیہ یہ تہوار مناتا تھا مگر اب  ہر خاص و عام اسے انجوائے کرتے ہیں، مارچ کے آخری ہفتہ سے ساکورا کا پھول مختلیف علاقوں میں کھلنا شروع ہو جاتے ہیں اور اپریل کے درمیان تک یہ سلسلہ جاری رہتا ہے ،ساکورا کے پھول کی عمر صرف ہفتہ دس دن ہوتی ہے اور وہی پھول جن سے عوام لطف اندوز ہوتی ہے پنکھریوں کی شکل میں سڑکوں اور گلیوں کو سفید و گلابی کر رہا ہوتا ہے، ہنا می کو منانے کے لئے شہری و علاقائی حکومتوں کی جانب سے باقاعدہ انتطامات کئے جاتے ہیں اور پارکوں اور ان جگکہوں جہاں ساکورا ہوتا ہے اسے روشنیوں سے منور کردیاجاتا ہے ۔
اور یہ منظر انتہائی خوب صورت ہوتا ہے

 

 

ارتھ ڈے

کل ساری دنیا میں ارتھ ڈے کے زریعے انرجی کی بچت کا پیغام پہنچا یا گیا۔جیو ٹی وی پر کئی دنوں سے کمپین چل رہی تھی کہ 23 مارچ کو رات ساڑھے آٹھ سے ایک گھنٹے کے لئے بجلی کی بچت کریں اور غیر ضروری بتیاں بجھا دیں ۔رات کو جیو پر پاکستان کے مختلیف شہروں کی سرکاری عمارتوں کے بتیاں بجانے کے مناظر دیکھائے جا رہے تھے،عوامی طور پر اس کا کتنا ردعمل ہوا پاکستان میں نہ ہونے کی وجہ اس کا تو مجھے علم نہی مگر یہ مناظر دیکھتے ہوئے مجھے دو سال پہلے یہاں جاپان کے وہ دن یاد آگئے جب زلزلے اور سونامی کے بعد جاپانی حکومت نے بجلی کی قلت کے سبب لوڈ شیڈینگ اور بجلی بچانے کا اعلان کیا ہوا تھا اور یہاں کی قوم نے اس کا اتنا مثبت جواب دیا کہ پورا ملک جو روشنیوں میں جگمگاتا تھا شام ہوتے ہی اندھیروں میں ڈوب جاتا تھا،شاپنگ سینٹر اسی طرح گاہکوں سے بھرے ہوتے تھے مگر جہاں چار چار لفٹیں لگی ہوئی تھیں وہاں ایک لفٹ استمعال کی جاتی تھی،اسکیلیٹر کے بجائے سیڑھیاں پر اترنا چڑھنا کیا جاتا تھا
مگر مجال ہے کہ کوئی شکایت کرے ،گھروں میں لوگوں نے جو بجلی کے پلگ مستقل لگے ہوتے ہیں ان تک کو نکال دیا ۔
        اس مثبت ردعمل پر ایک دو دنوں میں ہی حکومت کو لوڈشیڈینگ کا فیصلہ واپس لینا پرا۔ دوسری طرف جب ہماری حکومت نے  گرمیوں کے موسم میں بجلی کی بچت کے لئے صرف ایک گھنٹے شام کو جلدی بازاروں کو بند کرنے کا اعلان کیا تھا تو تاجروں نے  ایک ہنگامہ برپا کر دیا تھا۔واقعی قوم نعروں سے نہی عمل سے بنتی ہیں۔

عوامی شاعر جناب حبیب جالب کی یاد میں

وہ جو ابھی اس راہ گزر سے چاک گریباں گذرا تھا

اس آوارہ دیوانے کو جالب    جالب کہتے   ہیں

12 مارچ کو ایک ایسی شخصیت کی برسی گزری جس کا قلم اور جس کی آواز اپنی شاعری کے زریعے پچھلی پانچ دہایوںسے آمروں ،مطلقالعنان حکمرانوں کو للکاررتی رہی۔اس شخصیت کو دنیا حبیب جالب کے نام سے جانتی ہے ۔جو ساری عمر مظلوم و محروم عوام کے لئے شاعری کرتے رہےاور عوامی شاعر کہلائے یہ اور بات ہے کہ اب ان کے اشعار حکمران طبقہ کےلوگ بھی اپنے جلسوں میں پڑھنے لگے ہیں۔

حبیب جالب صاحب 24مارچ 1928 کو مشرقی پنجاب کے ضلع ہوشیار پور میں پیدا ہوئے ،اینگلو عربک ہائی اسکول دہلی اور گورنمنٹ ہائی اسکول جیکب لائن کراچی سے تعلیم حاصل کی ، روزنامہ جنگ اور پھر لائلپور ٹیکسٹائل مل سے روزگار کے سلسلے میں منسلک ہوئے۔

،پہلا  مجموعہ کلام برگ آوارہ کے نام سے 1957میں شائع کیا،مختلیف شہروں سے ہجرت کرتے ہوئے بلآخر لاہور میں مستقل آباد ہوگئے اور ان کا یہ شعر ہمیشہ کے لئے امر ہوگیا۔

                                                        یہ   اعجاز    ہے    حسن    آوارگی     کا

                                                        جہاں  بھی    گئے  داستاں چھوڑ  آئے

1958 میں پہلا آمریت کا دور شروع ہوا  ہر طرف بھاری بوٹوں اور بندوقوں کی گہن گرج تھی ایک جبر کا عالم تھا،1962میں اسی ایوبی آمریت نےنام نہاد دستور پیش کیا جس پر جالب صاحب نے کہا،

                                                        دیپ  جس  کا  محلات  ہی  میں  جلے     

                                                        چند لوگوں کی خوشیوں کو لے کر چلے     

                                                        وہ جو سائے میں ہر  مصلحت کےپلے    

                                                        ایسے  دستور  کو    صبح    بے  نور  کو

                                                        میں  نہیں   مانتا،     میں  نہیں   مانتا

اس نظم نے جالب صاحب کو ملک گیر شہرت عطا کی اور ملک بھر کے گلی کوچوں میں میں نہیں مانتا، میں نہیں مانتا گونجنےلگا،جب

1970کے انتخابات کے بعد جنرل یحییٰ خان نے اقتدار اکژیتی پارٹی کو منتقل نہی کیا اور اس کے جواب میں ان پر گولیاں برسایئں اس وقت

تقریباٌ  پورا مغربی پاکستان اس فوج کشی کی حمایت کر رہا تھااس وقت یہ جالب صاحب ہی تھے جو کہے رہے تھے،

                                                        محبت  گولیوں  سے  بو  رہے   ہو

                                                        وطن کا چہرہ خوں سے دھو رہے ہو

                                                        گماں  تم   کو کہ  رستہ کٹ رہا ہے

                                                        یقیں  مجھ کو کہ  منزل کھو رہے ہو

1974 میں وزیر اعظم بھٹو جن کے کندھوں پے بیٹھ کر مسند اقتدار پر پہنچے تھے ان سب کو نام نہاد حیدرآباد سازش کیس میں بند کردیا،اسی دور میں جالب صاحب کی یہ نظم بہت مشہور ہوئی

                                                        قصر شاہی سے یہ حکم صادر ہوا،لاڑکانے چلو،                   ورنہ تھانے چلو

ضیاء  الحق کے مارشل لاء  میں  جب حیدرآباد سازش کیس ختم ہوا  اور اس کے اسیروں کو رہائی ملی تو انہوں نے اوروں کی طرح بھٹو دشمنی میں نہ ہی ضیاءالحق سے ہاتھ ملایا اور نہ ہی فسطائیت کے ترانے گائے بلکہ انہوں تو کہا           

                                                        ظلمت  کو   ضیا ء صر صر  کو    صبا     بندے  کو   خدا  کیا  لکھنا

                                                        پتھر  کو   گہر ،دیوار   کو    در   ،     کرگس کو   ہما  کیا    لکھنا

                                                        اک حشر بپا ہے  گھر گھر  میں  دم     گھٹتا  ہے گنبد  بے در  میں         

                                                        اک شخص کے ہاتھوں مدت سے   رسوا ہے وطن دنیا بھر میں         

                                                        اے  دیدہ   ورو   اس     ذلت کو  قسمت  کا   لکھا  کیا   لکھنا

                                                        ظلمت   کو   ضیاء  صر صر   کو    صبا   بندے کو خدا کیا  لکھنا

مجھے آج بھی وہ وقت اچھی طرح یاد ہے جب میں طلباء سیاست میں سرگرم ہوتا تھا اور ضیائی آمریت اپنے عروج پر تھی، جہاں ایک ہلکا سا نعرہ لگانے پر دس کوڑے لگا دیے جاتے تھے، جیلیں سیاسی کارکنوں سے بھری ہوتی تھیں ،جلسہ و جلوس کا تو سوچ بھی نہی سکتے تھےایسے میں صرف کراچی پریس کلب ہی ہوتا تھا  جہاں کبھی یوم مئی یا یوم شہداءطلبا کے نام پر یا پھر پریس کلب کے سالانہ مشاعرے پر سارے شہر کے سیاسی کارکن جمع ہوتے اور وہیں پر جالب صاحب بھی ہوتے تھے اور ان کی نظموں کو سننے کے بعد پریس کلب کا پنڈال مارشل لاء مردہ باد ،فوجی آمریت مردہ باد کے نعروں سے گونج اٹھتا تھا۔بلکہ ایک بار فیڈرل بی ایریا کےمیدان میں سادات امروہہ  کی جانب سے کل پاک و ہند مشاعرے کا انتظام کیا گیا جس میں بڑے بڑے شعراء حضرات شریک ہوئےجالب صاحب کی باری کے بعد وہ نعرہ بازی ہوئی کہ سنا ہے منتظمین کو جواب دہی کرنی پڑی۔

آمریت کے بعد جب پیپلز پارٹی کا پہلا دور حکومت آیا اور عوام کے حالات کچھ نہ بدلے تو جالب صاحب کو کہنا پڑا،

                                                        وہی  حالات  ہیں  فقیروں  کے                                                  

                                                        دن پھریں ہیں  فقط وزیروں کے           

                                                        ہر بلاول ہے    دیس کا مقروض

                                                        پاؤں ننگے ہیں بے نظیروں کے

جالب صاحب نے اپنی ساری زندگی مظلموں کے لئے جدوجہد کرتے ہوئے گزاردی وہ شہرت کی ان بلندیوں پر تھے کہ اگر چاہتے تو اپنے یا

اپنے گھر والوں کےحالات سدھارسکتے تھے مگر ان کے ضمیر نے کبھی یہ گوارا نہی کیااور بلاآخر بیماری و تندستی میں اس شعر کے ساتھ 12مارچ 1993کو دنیا سے رخصت ہو گئے۔

                                                        بہت  تذلیل    تو    کرلی    ہماری    زندگانی    کی              

                                                        اجازت موت کی اب ہم کو بن کے مستقل دے دو۔